O alcalde defende un plan que aposta por ordenar, fronte ao «afán de prohibir» do bipartito

Autor: José Alonso

Fecha de publicación: 14/1/2010

Alfonso Fuente, alcalde de Barreiros (PP), concello da costa de Lugo que foi un dos expoñentes do bum urbanístico, cre que o plan do litoral da Xunta ven poñer un pouco de orde na «desfeita» do bipartito.

-Non hai ningún delito en que a xente queira ter unha casa preto da costa. O que non pode ser é que haxa privilexiados que con outros plans fixeron as súas vivendas na praia, e que despois se benefician dunha lei que prohibe edificar nos 500 metros de costa deixando núcleos sen rematar, con catro ou cinco casas illadas, unhas mirando cara un lado e outras cara outro. O plan do litoral corrixe isto e supón avances moi importantes porque marca as directrices a seguir, pero deixa liberdade aos concellos. De pouco serve prohibir edificar nos 500 metros se despois no metro 501 se permite un edificio de dez plantas.

-¿Beneficiará o plan ao sector da construción?

-Non teño dúbida. Segue habendo interese por comprar vivenda na costa de Lugo, e en particular en Barreiros, pero o problema é a inseguridade xurídica que provocou a intervención da anterior Xunta. O plan do litoral vai dar esa seguridade, poñer enriba da mesa unhas normas para que todo o mundo teña as mesmas regras, sen depender do que pense o cargo de turno.

-¿Sería bo prorrogar a prohibición de construír nos 500 metros?

-Para quen vive na capital, lonxe da costa, iso pode parecer bo, pero os que residimos na costa o que queremos é que se ordene, non que se prohiba. O afán do bipartito foi prohibir, vender un eslogan que o que fixo foi fundir ao sector da construción e ao turismo. Prohibir é sinxelo… e logo queixámonos da perda de postos de traballo, como pasou coa acuicultura. Hai unhas tipoloxías de núcleos que hai que preservar, pero no resto hai que ordenar. Hai que ordenar Galicia, marcando unhas directrices de como queremos que sexa, pero o sistema non é prohibir, porque hai que deixar vivir.